బూరె

ఆంధ్రప్రాంతములో ప్రతి శుభకార్యములో తప్పక ఉండే ప్రసిద్దమైన తీపి వంటకం, ఇవి తక్కువ ఖర్చుతో చేయవచ్చు. మెత్తటి వరిపిండికి నీటినిచేర్చి, పలుచగామార్చుతారు. దీనిని 'తోపు పిండి అంటారు. ఉడకబెట్టిన పచ్చిసెనగ పప్పు, బెల్లముతో కలిపి చేసిన మిశ్రమాన్ని ఉండలుగా మార్చి, ఆ ఉండలను తోపుపిండిలో ముంచి, వాటిని మరిగే నూనెలో వేయించడం ద్వారా బూరెలు తయారవుతాయి. వీటిలో నెయ్యి వేసుకుని తింటారు.

దస్త్రం:Boorelu.jpg

రుచికరమైన బూరెలు

పూర్ణం బూరెలు

పూర్ణం బూరెలు లేదా కుడుం బూరెలు ఒక ప్రత్యేకమైన బూరెలు. వీటికి మధ్యలో శనగపప్పుతో చేసిన పూర్ణం కలిగువుండి మినపపప్పుతో చేసిన తొక్క వుంటుంది.

కావలసిన పదార్ధాలు

• శనగ పప్పు - పావుకిలో
• బెల్లం లేదా చక్కెర - పావుకిలో
• మినప పప్పు - అర్ధాపావుకిలో
• మెత్తని బియ్యం పిండి - పావుకిలో
• ఎండు కొబ్బరి ముక్కలు
• ఏలకులు - తగినన్ని

బూరెలు/దోనేపూడి గ్రామంలో తీసిన చిత్రము

బూరెలు

తయారుచేయు విధానం

• బూరెలు వండడనికి మూడు గంటలు ముందుగా చోవి (బూరె పైన తొక్క కోసం) తయారుచేసుకోవాలి. దీనికోసం మినప పప్పు నానబెట్టి; గంటతర్వాత మెత్తని కాటుకలా రుబ్బి, ఆ రుబ్బినపిండిలో బియ్యపు పిండి పోసి కలిపి, చిటికెడు ఉప్పు వేసి గిన్నె మీద మూతపెట్టి ఉండనివ్వాలి. ఈ పిండిని కనీసం మూడు గంటలన్నా నానబెట్టాలి.
• శనగ పప్పు తక్కువ నీరుపోసి బాగా ఉడకనివ్వాలి. పప్పు చేతితో పట్టుకొని నొక్కి సూస్తే చితికిపోవాలి. తర్వాత పప్పులో నీరుగనక ఉంటే వంచేసి తరిగిన బెల్లం లేక చక్కెర పోసి ఉడకనివ్వాలి. ఈ మాదిరిగా పాకం పెట్టడం వల్ల బూరెలు రెండురోజులున్నా చెడిపోవు.
• ఏలకులు వొలిచి గింజలు పొడుంలాగా దంచుకోవాలి. కొబ్బరి సన్నంగా ముక్కలు తరిగి నేతిలో చేయించుకోవాలి.
• పాకం గిన్నెలోని పప్పుని గరిటెతో బాగా కుమ్మి, అందులో ఏలకులపొడి, కొబ్బరిముక్కలు వేసి, నేతితో బాగా కలిసేటట్లు పిసికి, తరువాత నిమ్మకాయంత ఉండలు చేసుకోవాలి.
• పొయ్యిమీద బూరెల మూకుడు పెట్టి, నూనె మరిగాక, ఒక్కొక్క పూర్ణపు ఉండ సిద్ధంగా ఉంచుకున్న చోవిలో ముంచి, నూనెలోవేసి, ఎర్రగా వేగాక తీసి విడిగా పెట్టుకోవాలి. బూరెచోవి మరీ పల్చగా ఉండకూడదు, మరీ గట్టిగా ఉండకూడదు.